പരസ്യം നമ്പര്‍ 1: ബാധ്യതകള്‍ പ്രശ്നമല്ലാത്ത നായര്‍ യുവതി USA
‘21 വയസ്സുള്ള  വെളുത്തു സുന്ദരിയായ നായര്‍ യുവതി‌, അനേകം കോടി സ്വത്തുക്കളുടെ ഏക അവകാശി, ആദ്യ വിവാഹം, അച്ഛനും അമ്മയും ഒരുമിച്ച് USAയില്‍ സ്ഥിരതാമസം, വരന്റെ ജാതി, മതം, സാമ്പത്തികം, ബാധ്യതകള്‍, ജില്ല, സംസ്ഥാനം, രാജ്യം, സൌന്ദര്യം എന്നിവ പ്രശ്നമല്ല, ദത്തും സമ്മതം, കുട്ടികളുള്ളതും ആവാം, യാതൊരു ഡിമാണ്ടും ഇല്ല, കൊണ്ടുപോകും, വിളിക്കുക ‘വഴിപാട്’ തിരൂര്‍ 09321012345, 04943210123′

വായിച്ചിട്ട് എന്ത് തോന്നി, ‘ലവന്‍ ഏതു കൊത്താഴത്ത്കാരന്‍ കൊഞ്ഞാണന്‍ ആയാലും കുഴപ്പമില്ല, ലവള്‍ക്ക് ലവന്‍ മതി’ എന്നോ ?

ഈ പറഞ്ഞിരിക്കുന്ന യോഗ്യതകള്‍ ഒക്കെ വച്ചു, വല്ല ബില്‍ഗെറ്റ്സിന്റെയോ, ലക്ഷ്മി മിത്തലിന്റെയോ അല്ലെങ്കില്‍ ആ സ്റ്റാന്‍ഡേര്‍ഡുള്ള ആരുടെയെങ്കിലും മക്കളെ കിട്ടുക ഒരു പ്രശ്നമല്ല. അപ്പോള്‍ ഈ പരസ്യത്തിന്റെ പിന്നിലുള്ള ഉദ്ദേശം എന്തായിരിക്കും ?

ഇത്രയും ഉണ്ടായിട്ടു ഈ പറഞ്ഞ സ്റ്റാന്‍ഡേര്‍ഡുള്ളതു പോട്ടെ, കൊള്ളാവുന്ന ഒരു മന്ത്രിയുടെയോ, എമ്മല്ലെയുടെയോ മക്കളെയോ അല്ലെങ്കില്‍ നാട്ടു നടപ്പനുസരിച്ച് കൊള്ളാവുന്ന ഒരു NSS മെമ്പര്‍ഷിപ്‌ ഉള്ളവനെയോ പോലും ഇവള്‍ക്ക് കിട്ടില്ല എന്നാണോ ?

പിന്നെ ഇത്രയും ഒക്കെ വേണ്ടാ എന്ന് പറഞ്ഞിട്ട് ഇവളുടെ പതിനാറാമത്തെ കല്യാണമാണ് എന്ന് തെറ്റിദ്ധരിക്കണ്ടാ എന്ന് കരുതിയാണ് ‘ആദ്യ വിവാഹം’ എന്ന് എടുത്തു പറഞ്ഞിരിക്കുന്നത്.

വെയിറ്റ്… വേറെ ചിലത് കൂടി കാണാം,

പരസ്യം നമ്പര്‍ 2: മുസ്ലിം വിധവ 20 , ലണ്ടന്‍

‘തന്ടേതല്ലാത്ത കാരണത്താല്‍ വിവാഹ ബന്ധം വേര്‍പെടുത്തിയ 20 വയസ്സുള്ള ധീനിബോധം ഉള്ള സുന്ദരിയായ മുസ്ലീം വിധവ, ലണ്ടന്‍, ഉമ്മയും ബാപ്പയും വിമാനാപകടത്തില്‍ മരിച്ചു പോയി, നല്ല സാമ്പത്തികം, ഒറ്റ മകള്‍, വരന്റെ സാമ്പത്തികം, ജാതി, മതം, ജില്ല, ജോലി, നിലവിലുള്ള ബാധ്യതകള്‍ എന്നിവ പ്രശ്നമല്ല, യാതൊരു ഡിമാണ്ടുമില്ല, പുനര്‍വിവാഹിതരേയും പരിഗണിക്കും, 09876543210 , 04830123456  ‘ആഗ്രഹാ’ കോട്ടക്കല്‍’

ആഹാ, എത്ര മനോഹരമായ (നടക്കാത്ത) സ്വപ്നം, വാര്‍ക്ക പണിക്കു പോകുന്ന ഒരു പാവം മലപ്പുറത്തുകാരന്റെ  മുഴുവന്‍ സ്വപ്നങ്ങളും ഒറ്റ പരസ്യത്തില്‍. ആദ്യത്തേതില്‍ നിന്നും ഒരേ ഒരു വെത്യാസം മാത്രം, മുസ്ലിം വിധവ !

സ്പെഷ്യല്‍ അറ്റ്രാക്ഷന്‍: ഉമ്മേം ബാപ്പേം നേരത്തെ തന്നെ ‘ബിമാനത്തീന്നു ബീന്’ കഴിച്ചിലായി. പിന്നെ ഒറ്റ മോളും, ഓള് ഇപ്പൊ സഹായിക്കാന്‍ ആരൂല്ലണ്ടേ ലണ്ടനി കെടന്നു കഷ്ടപ്പെടുകയവൂലോ എന്റെ ബധരീങ്ങളെ !

പരസ്യം നമ്പര്‍ 3: ജാതി, മതം എന്നിവ പ്രശ്നമല്ലാത്ത ഈഴവ യുവതി 40

‘Divorcee, കുട്ടികളില്ല, സ്വന്തമായി നിരവധി സ്ഥാപങ്ങള്‍, വരന്റെ ജോലി, പ്രായം, നിലവിലുള്ള ബാധ്യതകള്‍ എന്നിവ കാര്യമാക്കുന്നില്ല, വരനെ സാമ്പത്തികമായി സഹായിക്കുകയും ചെയ്യും, കൂടെ താമസിച്ചു സ്നേഹിക്കാനും അംഗീകരിക്കാനും കഴിയുന്നവര്‍ക്ക് മുന്‍ഗണന, രജി. മാര്യെജും ആവാം, ‘അത്യാഗ്രഹ’ മഞ്ചേരി, 09383736353 , 04830123456′

ഇത്രയും വായിച്ചിട്ടുംപരസ്യം കൊടുത്തവന്റെ ഉദ്ദേശം മനസ്സിലാവത്തവര്‍ക്ക് വേണ്ടി സ്പെഷ്യല്‍ ആയി കൊടുത്തിരിക്കുന്നു ‘വരനെ സാമ്പത്തികമായി സഹായിക്കും’ എന്ന്. എന്ന്വെച്ചാല്‍ ‘എടാ ഊമ്പങ്കണ്ണാ, ഇവളെ കെട്ടിയാല്‍ ‘പരിപാടി’ അനുസരിച്ചു നിനക്ക് കാശും കിട്ടും’ എന്നന്നെ !

ഈ പരസ്യങ്ങള്‍ എല്ലാം വായിച്ചിട്ട് ഒരു കാര്യം എഴുതാന്‍  മുട്ടീട്ടു വയ്യ !

ഇതെഴുതിയവന്‍ ‘മാട്രിമോണിയല്‍ ‘കോപ്പിറൈറ്റിങ്ങില്‍’ Phd എടുത്തവന്‍ ആയിരിക്കണം. കാരണം ഓരോ വാക്കിനും വാചകത്തിനും കൃത്യമായ അര്‍ത്ഥതലങ്ങള്‍ ഉണ്ട്. ഉദാഹരണത്തിന് ‘രജി. മാര്യെജും ആവാം’, അതായത് ‘കല്യാണ ചെലവ് പോലും ഇവന് വരില്ല’ എന്നര്‍ത്ഥം. എങ്ങനുണ്ട് ബുദ്ധി ?

വേറൊരു ഉദാഹരണം,’കൂടെ താമസിച്ചു സ്നേഹിക്കാനും അംഗീകരിക്കാനും കഴിയുന്നവര്‍ക്ക് മുന്‍ഗണന’ എന്ന്, വല്ലതും മനസ്സിലായാ ? ‘ദത്തും നില്‍ക്കാം’ എന്നതിന്റെ നാട്ടിന്‍പുറം രൂപമാണ് ഈ പറഞ്ഞത്. അതായത് ഇത് വായിക്കുമ്പോള്‍ തോന്നണം ‘ഓള് സ്നേഹിക്കാനും സ്നേഹിക്കപ്പെടാനും ഒരു തലോടലിനും വേണ്ടി ‘മുട്ടി’ നില്‍ക്കുകയാണെന്ന്  ഏത് ?’. അതായത് ഇവന്‍ അങ്ങോട്ട്‌ ചെന്നാല്‍ മതി വേറെ ഒരു പ്രശ്നവും ഉണ്ടാവില്ല എന്നര്‍ത്ഥം.

പുരുഷന്മാരെ മാത്രം ഉദ്ദേശിച്ചുള്ള പരസ്യങ്ങളെ ഉള്ളു എന്ന് കരുതരുത്, വേറൊരെണ്ണം …

പരസ്യം നമ്പര് ‍4: നായര്‍ മധ്യവയസ്കന്‍ 41 ജര്‍മ്മനി

സുമുഖനും വിഭാര്യനും കോടികളുടെ ആസ്തി ഉള്ളവനും ജര്‍മനിയില്‍ സ്ഥിര താമസക്കാരനും ആയ ബാധ്യതകള്‍ ഇല്ലാത്ത മധ്യവയസ്കന്‍, വധുവിന്റെ ജാതി, ജില്ല, സാമ്പത്തികം ഇതൊന്നും കണക്കാക്കുന്നില്ല, വധുവിന്റെ കുടുംബത്തെ സ്വന്തം കുടുംബത്തെപോലെ കരുതി സംരക്ഷിക്കും, പുനര്‍ വിവാഹിതരേയും കുട്ടികള്‍ ഉള്ളവരെയും പരിഗണിക്കും (ഇതും ലവന്റെ തന്നെ) ‘അത്യാഗ്രഹ’ മഞ്ചേരി, 09383736353 , 04830123456′

‘മാട്രിമോണിയല്‍ കോപ്പിറൈറ്റിംഗ് മാജിക്’ വീണ്ടും, ഈ പരസ്യം ടാര്‍ഗെറ്റ് ചെയ്യുന്നത് വേറൊരു വിഭാഗം ആള്‍ക്കാരെ ആണ്, അതാണു ‘വധുവിന്റെ കുടുംബത്തെ സ്വന്തം കുടുംബത്തെ പോലെ കാണും’ എന്ന് പറഞ്ഞത്.

തീര്‍ന്നില്ല… ഒന്ന് രണ്ടെണ്ണം കൂടി നോക്കിയാല്‍ ഇവരുടെ ഇവരുടെ ഈ കാടടച്ചുള്ള വെടി വെയ്പ്പിന്റെ ഒരു ഐഡിയ കിട്ടും.

പരസ്യം നമ്പര് ‍5: കുട്ടികള്‍ ഉണ്ടാവാന്‍ സാധ്യതയില്ലാത്ത RC യുവതി 25, നഴ്സ് ഇറ്റലി

ദൈവഭയമുള്ള RC യുവതി 25 , ആദ്യ വിവാഹം, വരന്റെ ഒന്നും പ്രശ്നമല്ല, കുട്ടികള്‍ ഉണ്ടാവാന്‍ സാധ്യതയില്ല, പുനര്‍ വിവാഹക്കാരെയും കുട്ടികള്‍ ഉള്ളവരെയും പരിഗണിക്കും, കൊണ്ടുപോകും, സെന്റ്‌. മേരീസ്, കോട്ടയം, 09440000001′

അവന്റെ ഒരു മൈ%$# അവള്‍ക്കു പ്രശ്നമല്ല ! അവന്‍ വരനാനെന്നു പറഞ്ഞു അങ്ങോട്ട്‌ ചെന്നാല്‍ മതി, ബാക്കി അവള്‍ നോക്കിക്കൊള്ളും !

പിന്നെ ആദ്യ വിവാഹം ആയതുകൊണ്ട്, ഈ ‘കുരുന്നു’ പ്രായത്തില്‍ തന്നെ, ദൈവഭയമുള്ള ആ പാവം കുഞ്ഞാട്, കുട്ടികള്‍ ഉണ്ടാവുമോ എന്ന് പല പ്രാവശ്യം ‘ടെസ്റ്റ്‌’ ചെയ്തിട്ട് പരാജയപ്പെട്ടതാണ്. അതുകൊണ്ട് അതും ഒരു യോഗ്യതയായി മാറി !

പിന്നെ ഒരു സന്തോഷം കൂടി, ‘കൊണ്ടുപോകും’ ! (പാശ്ചാത്തലത്തില്‍: കൊണ്ട് പോകും നിങ്ങളെയാ …….)

പരസ്യം നമ്പര് 6: രെജിസ്ട്രേഷന്‍ ഫ്രീ, നോ കമ്മീഷന്‍ (ഫയര്‍ എറൌണ്ട് ദി ബുഷ്‌ !)
‘നായര്‍ (പള്ളിച്ചാന്‍, അത്തിക്കുറിശ്ശി, വെളക്കത്തല, പിള്ള), കുറുപ്പ്, തട്ടാന്‍ (സ്വര്‍ണം, ഓട്, പിച്ചള), മേനോന്‍, ഈഴവ, പുലയ, പറയ,  മുസ്ലിം (എല്ലാ വിഭാഗവും), ക്രിസ്ത്യന്‍ (എല്ലാ വിഭാഗവും) ഉള്ളവര്‍ക്ക് രെജിസ്ട്രേഷന്‍ സൌജന്യം

(ഇതല്ലാതെ വേറൊരു ജാതി ഒന്ന് കാണിച്ചു താടോ പുളുന്താനെ ?)

ശുദ്ധജാതകം, പാപജാതകം, ‘കമ്പ്യൂട്ടര്‍ ജാതകം’ (ഇത് വേറെന്തോ ടൈപ്പ് ആണെന്ന് വിചാരിച്ചിരിക്കുന്നു), ചൊവ്വ ദോഷം, ബുധന്‍ ദോഷം (അതെതാടപ്പാ ?), വിധവകള്‍, വിഭാര്യര്‍‍, സോഫ്റ്റ്‌വെയര്‍, ഹാര്‍ഡ്‌വെയര്‍, നെറ്റ്‌വര്‍ക്ക്, ബംഗ്ലൂര്‍, USA , ലണ്ടന്‍, ആസ്ട്രേലിയ, ജര്‍മ്മനി, സിങ്കപ്പൂര്‍, എന്നിങ്ങനെ നൂറു കണക്കിന് വിഭാഗങ്ങള്‍.

(എന്തോന്നിത്, മൂന്നാം ക്ലാസ്സിലെ കേട്ടെഴുത്ത് സമയമോ ?)

ഓഫീസ് – ഹോസ്ദുര്‍ഗ്, കണ്ണൂര്‍, പയ്യന്നൂര്‍, മലപ്പുറം, തിരൂരങ്ങാടി, ബത്തേരി, മഞ്ചേരി, വളപട്ടണം, പാലക്കാട്, തൃശൂര്‍, ഗുരുവായൂര്‍, കച്ചേരിപ്പടി, മാനന്തവാടി, എരുമേലി, കോട്ടയം, ചിന്നക്കട, പെട്ട, ആറ്റിങ്ങല്‍, നെയ്യാറ്റിന്‍കര, ആറ്റുകാല്‍ (പിന്നെ ഒരു ആയിരത്തി അഞ്ഞൂറ് മൊബൈല്‍ നമ്പരുകളും), ഞങ്ങള്‍ക്ക് വേറെ ബ്രാഞ്ചുകളോ ഏജെന്റുമാരോ ഇല്ല’

(ഇനി ആരുടെ കാലിന്റെ ഇടയിലാണ് ബ്രാഞ്ചു വെക്കേണ്ടത് ? ഭാഗ്യം, പമ്പയിലും, സന്നിധാനത്തും, തുടങ്ങാതിരുന്നത്‌ !)

അപ്പൊ എന്താണിഷ്ടാ  ഈ പരിപാടിയുടെ ഒരു ഗുട്ടന്‍സ് ?

പറയാതിരിക്കാന്‍ പറ്റുന്നില്ല സുഹൃത്തെ, കൂനമ്മൂച്ചിയിലും, തിരൂരും, മഞ്ചേരിയിലും, ഇതിനും മാത്രം വിധവകളും, വിഭാര്യന്മാരും ഉണ്ടായത് അത്ഭുതം തന്നെ ! ഇനി ഇവന്മാരൊക്കെ ഭൂലോക ലെവലില്‍ (ഇന്റര്‍നാഷണല്‍ ലെവല്‍) മാര്‍ക്കറ്റിംഗ് നടത്തി എന്നാണെങ്കില്‍ ഈ ഫീല്‍ഡിലെ തലതോട്ടപ്പന്മാര്‍ക്ക് അറിയാത്ത എന്ത് മാര്‍ക്കറ്റിംഗ് ടെക്നിക് ആണ് ഇവിടുത്തെ ‘IIM’ വിദഗ്ദര്‍ കണ്ടെത്തിയിരിക്കുന്നത് ?

ഒന്നേ ഒന്ന് മാത്രം, മലയാളിയുടെ കുലത്തൊഴില്‍ ‘ഉഡായ്പ്’  !

ഈ പരസ്യത്തില്‍ പറഞ്ഞിരിക്കുന്നവര്‍ എല്ലാം ‘ലോക സമസ്ത സുഖിനോ’ ടീമുകള്‍ ആണോ ? അതോ ‘ഉടുതുണിക്ക്‌ മറുതുണി’ ഇല്ലാത്തവരെ ഒന്ന് സഹായിക്കാം എന്ന് കരുതിയിട്ടോ?

ഉണ്ടയാണ് ഗഡി, രണ്ടുണ്ട !

ജീവിതത്തില്‍ രക്ഷപ്പെടാന്‍ കല്ല്യാണം മാത്രമേ രക്ഷയുള്ളൂ എന്ന് കരുതുന്ന ‘കിണ്ടി മനോജിനെ’ പോലുള്ളവന്മാരെ പറ്റിച്ചു (അവളുമാരെയും, അവരുടെയൊക്കെ ‘ഡാഷ്’ മാതാപിതാക്കളെയും ചേര്‍ത്ത് വായിക്കാന്‍ അപേക്ഷ), അന്നന്നത്തെ അത്താഴത്തിനു വക കണ്ടെത്തുന്ന ഗജ ഫ്രോഡുകളുടെ പല പല നമ്പരുകളില്‍ ഒന്ന് മാത്രമാണ് സുഹൃത്തെ ഈ ‘ബാധ്യതകളില്ല, ഡിമാണ്ടില്ല’ പരിപാടി.

ഒറ്റെയെണ്ണം നമ്മുടെ വലയില്‍ നിന്നും രക്ഷപ്പെടാന്‍ പാടില്ല എന്നത് കൊണ്ട് ഒരു ഏജന്‍സി തന്നെ പല പല പരസ്യങ്ങള്‍ കൊടുത്തിട്ടുണ്ട് !

ഓരോ കാലഘട്ടത്തില്‍ ഓരോരോ ലൊക്കേഷന്‍ കേന്ദ്രീകരിച്ചാവും ഇവരുടെ ‘വലയെറിയാല്‍’. ഒരു ഏരിയയില്‍ നിന്നും മാക്സിമം രേജിസ്ട്രെഷനുകള്‍ ആയാല്‍ പിന്നെ അവിടുത്തെ ‘കച്ചോടം’ അവസാനിപ്പിച്ചു ഇവര്‍ പുതിയ മേച്ചില്‍ പുറങ്ങള്‍ അന്വേഷിച്ചു പോകും. രേജിസ്റെര്‍ ചെയ്യുന്നവന്‍ അന്വേഷിച്ചു ചെല്ലുമ്പോള്‍ അവിടെ പിന്നെ ‘കമലവിലാസ് കണ്മഷി ആന്റ് ചാന്തും’ വില്‍ക്കുന്ന ബ്യൂടി ഷോപ്പ് ആയിരിക്കും കാണുക.

വിദേശ ഇരകളെ ഇട്ടു മാത്രമാണ് വലയെറിയുന്നത്‌ എന്ന് കരുതരുത്..

വികലാംഗയായ ഒറ്റമകള്‍, വിഭാര്യനായ സ്കൂള്‍ ‘മേഷ്’, BSc നഴ്സ് ‘ലൂക്കിംഗ് ഫോര്‍ SSLC‍’ എന്നിങ്ങനെയുള്ള സ്വദേശ വലകളും ഉണ്ട്.

വല ഏതായാലും, ചില പൊതുവായ സ്വഭാവങ്ങള്‍ എല്ലാവരിലും കാണാം.

• പരസ്യം കൊടുത്ത്തിരിക്കുന്നവര്‍ ഗംഭീര സുന്ദരന്മാരും / സുന്ദരികളും ആയിരിക്കും  എന്നാല്‍ മറുപക്ഷത്ത് സുന്ദരികളോ / സുന്ദരന്‍മാരോ ആകണം എന്ന് ആര്‍ക്കും നിര്‍ബന്ധം ഇല്ല താനും (നിര്‍ബന്ധം ഒരു കാര്യത്തിലും ഇല്ല, പിന്നെന്തിനു ഈ കാര്യത്തില്‍ മാത്രം, എന്നാലും പറഞ്ഞപ്പോള്‍ പറഞ്ഞു എന്ന് മാത്രം !)
• എല്ലാവരും നല്ല സാമ്പത്തികം ഉള്ളവര്‍, മിക്കവാറും കോടീശ്വരന്‍മാരും കോടീശ്വരികളും, അല്ലാത്തവര്‍ ലക്ഷപ്രഭുക്കളും അനേകം സ്ഥാപനങ്ങളുടെ ഉടമകളും ആണ്, നേരത്തെ പറഞ്ഞ പോലെ വരാന്‍ പോകുന്ന കക്ഷി ‘കുത്തുപാള’ ആണെങ്കില്‍ അതൊരു അധിക യോഗ്യത ആയി കണക്കാക്കും !
• ഈ പരസ്യങ്ങള്‍ വായിച്ചാല്‍ (ഇവിടെ കൊടുത്തത് മാത്രമല്ല, ഞായറാഴ്ചകളില്‍ കാണുന്ന മിക്കവാറും എല്ലാ ‘ബ്യൂറോ’ പരസ്യങ്ങളും) ഇവരില്‍ ഒരാള് പോലും ഇവരുടെ കാരണം കൊണ്ട് ബന്ധം വേര്‍പെടുത്തിയതായി കാണാന്‍ കഴിയില്ല, അപ്പൊ മറ്റേ പ്രശ്നക്കാരോക്കെ എവിടെ പോയി ?
• പിന്നെ ഈ ലോകത്ത് ഏറ്റവും കൂടുതല്‍ മാര്‍ക്കറ്റ്‌ ഉള്ളത് പങ്കാളി മരിച്ചു പോയവര്‍ക്കും, അതില്‍ ബാധ്യതകള്‍ അഥവാ ‘മോണ്‍സ്റ്റെഴ്സ്’ ഉള്ളവര്‍ക്കും ആണെന്ന് നമുക്ക് എളുപ്പം മനസ്സിലാകും, (എന്റെ ഭാര്യയെ അങ്ങോട്ട്‌ തട്ടിയാലോ എന്ന് വരെ തോന്നുന്നു, അവള്‍ക്കു അത് നേരത്തെ തന്നെ തോന്നിയിട്ടുണ്ടാവണം !)
• ‘ഏകദേശ’ രൂപത്തില്‍ പുരുഷനോ സ്ത്രീയോ ആയാല്‍ തന്നെ (മറ്റു ‘ഗടിപിടികള്‍’ ഒന്നും ഒരു പ്രശ്നമല്ല എന്നര്‍ത്ഥം)  MNC കമ്പനിയുടെ VP ആണെന്ന് പറഞ്ഞാലും കിട്ടാത്ത അത്രയും സൌഭാഗ്യങ്ങള്‍ എല്ലാ പരസ്യത്തിലും ഓഫര്‍ ചെയ്തിട്ടുണ്ട്.
• പരസ്യം കൊടുത്ത ഒരു ‘മനിത’ ജീവിക്കും മറുപുറത്തേ  ജാതി, ജില്ല, മതം, വിദ്യാഭ്യാസം, ജോലി, കുടുംബം, വയസ്സ് എന്നിങ്ങനെ ഒരു ശരാശരി മനുഷ്യന്റെ ജീവിത ചിഹ്നങ്ങള്‍ ഒന്നും പ്രശ്നമല്ല, wow ! (ഇതിനു പകരം മലയാളത്തില്‍ ഒരു വാക്കില്ല !)

‘കൂനമ്മൂച്ചി’ അഖിലലോക ഫ്രോഡിന്‍റെ ഒരു പരസ്യത്തില്‍ ഏകദേശം 45000 നമ്പൂതിരി സോഫ്റ്റ്‌വെയര്‍ എഞ്ചിനീയര്‍മാരുടെ ഡാറ്റാബേസ് ഉണ്ടെന്നാണ് പറയുന്നത്, ഏകദേശം 55000 നമ്പീശന്‍ എഞ്ചിനീയര്‍മാരും !

ഈ അഖിലാണ്ട മണ്ഡലത്തില്‍ ആകെയുള്ള സകലമാന നമ്പീശന്‍മാരും നമ്പൂതിരിമാരും  ഈ ‘സാറിന്റെ’ അണ്ടര്‍വെയറിന്റെ പോക്കറ്റില്‍ ഉണ്ടെന്നാണ് പറയുന്നത്. എന്ത് ചെയ്യും വിശ്വസിക്കാതിരിക്കാന്‍ പറ്റുമോ ?

ഒരു ടെലിഫോണ്‍ ‘വീരഗാഥ’ !

കിര്‍നീം കിര്‍നീം കിര്‍നീം …

‘ഹലോ’ ഒരു കിളി

‘ഹലോ അത്യാഗ്രഹ മാര്യേജ് ബ്യൂറോ അല്ലേ ?’

‘അതേ, പറയൂ’

‘പത്രത്തില്‍ ഒരു പരസ്യം കണ്ടു വിളിച്ചതാണ്’

‘ഏതു പത്രം, എവിടെ നിന്നും വിളിക്കുന്നു ?’ (’അങ്ങിനെ എത്ര എത്ര വലകള്‍, എവിടെയിക്കെ വിരിച്ചിരിക്കുന്നു, ആദ്യം ഏതു വല പോക്കിയാണ് നിങ്ങള്‍ അകത്തു കയറുന്നത് എന്ന് പറയൂ’ എന്ന് വ്യംഗ്യം)

‘ഞാന്‍ ബംഗ്ലൂരില്‍ നിന്നാ, ആ 21 വയസ്സുള്ള നായര്‍ യുവതിയില്ലേ,  അമേരിക്കക്കാരി , ഓള്‍ടെ കാര്യം ഒന്നറിയാനാണ്’

‘എന്താ പേര് ?’

‘എന്റെ പേര് കുഞ്ഞുമുഹമ്മദ്‌, എവിടെ താവരക്കരെ ജംക്ഷനില്‍ ബേക്കറി നടത്തുകയാണ് ഞമ്മള്, നമ്മടെ മൂനാമത്തെ കെട്ട്യോള് സുഹ്രേനെ മൊഴി ചൊല്ലിയതില്‍ പിന്നെ വല്ലാത്ത കഷ്ടാണ്‌ മോളെ !’

‘ഹി ഹി (അപ്പുറത്ത് നിന്നും ചിരി), എത്ര വയസ്സായി ?’ (വീണ്ടും അടക്കിപ്പിടിച്ചുള്ള ചിരി)

‘വയസ്സോന്നും ഒരു പ്രശ്നമല്ലേ, സംഗതി ഇപ്പോഴും സ്ട്രോങ്ങ്‌ ആണ്, അത് മതിയാവില്ലേ മ്ടെ അമേരിക്കകാരിക്ക് ?’

അപ്പുറത്ത് ഫോണ്‍ നിലത്തു വീഴുന്ന ശബ്ദം പിന്നെ അല്‍പ്പം കഴിഞ്ഞു, ഇപ്പൊ പൊട്ടും എന്ന ഭാവത്തില്‍ വീണ്ടും ചോദ്യം  ‘എന്നാലും വയസ്സ് പറയു’

‘കണ്ടാല്‍ ഒരു അമ്പത്തഞ്ച് പറയുമെങ്ങിലും ഒരു നാല്‍പ്പതില്‍ കൂടില്ല’ (പഷ്ട്ട്)

‘അത് കുഴപ്പം ഒന്നും ഇല്ല (അല്ലെങ്കില്‍ ഏതാ കുഴപ്പം ?), ഇവിടെ വന്നു പേര് രജിസ്റ്റര്‍ ചെയ്യണം, രെജിസ്ട്രേഷന്‍ ഫീസ്‌ രണ്ടായിരം രൂപ’

‘അതൊക്കെ തരാം, അതിനു മുന്പ് ഓളെ ഒന്ന് കാണാന്‍ പറ്റുമോ ?’

‘രെജിസ്ട്രേഷന്‍ കഴിയാതെ ‘ഒന്നും’ നടക്കില്ല’

‘വേറൊന്നും നടത്താനല്ല മോളെ, മോഞ്ചത്തീനെ ബെറുതെ ഒന്ന് കാണാനാണെന്നെ ?’

‘ഹി ഹി (വീണ്ടും ചിരി) അത് പറ്റില്ല’

‘നേരിട്ട് കാണാണ്ട് നമ്മള്‍ ഒരു ആടിനെപ്പോലും വാങ്ങാറില്ല, അപ്പൊ ഇതെങ്ങിനാണ് മോളെ ?’

‘ഇത് ആടും പശുവും ഒന്നും അല്ലല്ലോ സര്‍ ?’

‘എന്താ വെത്യാസം കറവെടെ കാര്യം ഒഴിച്ചു ബാക്കി എല്ലാം അതുപോലെ അല്ലേ നടക്കുന്നത് ?’

അപ്പുറത്ത് മൌനം.

‘എന്നാല്‍ ഒരു ഫോട്ടോ ?’ വീണ്ടും

‘രെജിസ്ട്രേഷന്‍ കഴിഞ്ഞു നിങ്ങളുടെ ഫോട്ടോ അവര്‍ക്ക് ഇഷ്ട്ടപ്പെട്ടാല്‍ മാത്രമേ അവരുടെ ഫോട്ടോ നിങ്ങളെ കാണിക്കൂ’

‘ഇഷ്ടപ്പെട്ടില്ലെങ്കിലോ ?’

‘ഇഷ്ടപ്പെട്ടില്ലെങ്കില്‍,,,, (ഒരു നിമിഷം) ഞങ്ങള്‍ വേറെ ആള്‍ക്കാര്‍ക്കും ഇതയച്ചു കൊടുക്കും’.

‘വേറെ ആളെ ഒന്നും ഞമ്മക്ക് വേണ്ട, ഇഷ്ടപ്പെട്ടില്ലെങ്കില് അടച്ച കായ് തിരിച്ചു കിട്ടുമോ ?’

‘അതില്ല പക്ഷെ ഞങ്ങള്‍ വേറെ….’

‘നിര്‍ത്ത് നിര്‍ത്ത് വേറെ ആള്‍ടെ കാര്യം അവടെ നിക്കട്ടെ. ആദ്യം ഇത് പറ’

‘അത്….’

‘ശരി, അപ്പൊ എങ്ങനാ എടവാട്, കായ് ബംഗ്ലൂരില്‍ അടക്കാന്‍ പറ്റുമോ ? നിങ്ങള്ക്ക് ഇവിടെ ബ്രാഞ്ചും എജെന്റും ഒന്നും ഇല്ലല്ലോ ?’

‘അതൊന്നും ഇല്ല, പക്ഷെ നിങ്ങളുടെ ഫോണ്‍  നമ്പര്‍ തന്നാല് മതി‍, ഞങ്ങള്‍ ആളെ അങ്ങോട്ട്‌ വിടാം’

‘ആലോചിക്കാം’

‘അപ്പൊ സാറിന്റെ നമ്പര്‍ ?’

‘അതിക്കെ തരാം, ആദ്യം ഇന്റെ പേരെന്താന്നു പറ’

‘സുഹ്രാന്നു’ വീണ്ടും ചിരി.

‘അള്ളാ സുഹ്രാന്നാ ? അന്നട്ടു ഞീ എന്തേ അത് ഇത്രേം നേരായിട്ടും മ്മളോട് പറയാഞ്ഞത്’

‘ങ്ങള് ചോദിച്ചില്ലല്ലോ ?’

‘അന്റെ നിക്കാഹു കഴിഞ്ഞതാ’

‘ങ്ങു ഹും’

‘ന്‍റെ പൊന്നെ, ആദ്യം ന്‍റെ നമ്പര്‍ താ !’

‘ങ്ങള്‍ടെ നമ്പര്‍ താ ഞാന്‍ രാത്രി വിളിച്ചോളാം !’

‘ഇന്നാ പിടിച്ചോ 9846098460, കിട്ടിയാ ?’

‘ഉം, രാത്രി 12 മണി കഴിഞ്ഞു വിളിച്ചാല്‍ കുഴപ്പാവോ ഇക്ക ?’

‘എന്ത് കുഴപ്പം, അതല്ലേ ബെസ്റ്റ് ടൈം ?’

‘അപ്പൊ രെജിസ്ട്രേഷന്‍ ?’

‘ഇനി എന്തിനാണ് മോളെ രെജിസ്ട്രേഷന്‍ ? ആ കായിന് അനക്ക് ഞാന്‍ റിചാര്‍ജ് ചെയ്തു തന്നാ പോരെ എന്റെ മുത്തെ ?’

‘മതി എന്റെ ഇക്കാ’

‘സുഹ്രാ’

‘ഇക്കാ’

ഹോ !